O Extruga Festival de Verín busca artistas emerxentes para actuar na edición de 2025

CULTURA URBANA

O evento Extruga Festival, que combinará música, arte, gastronomía e cultura urbana o 19 de xullo en Verín, organiza un concurso para atopar artistas xóvenes

Os coruñeses Another Wasted Year (AWY), gañadores do concurso "Música Emerxente" do Festival Extruga en 2023. | Laura Prieto

O festival verinense de música e cultura urbana Extruga Festival retoma o concurso “Música Emerxente”, co que busca a unha banda, solista ou DJ ascendente, e que levará de premio 400 euros e actuar no propio Extruga, o vindeiro 19 de xullo.

Os grupos ou cantantes interesados en se inscribir teñen tempo ata este xoves, día 3 de abril. Para participar basta con deixar un comentario na publicación do Extruga no Instagram (@extruganarua) e a organización contactará para formalizar a inscrición.

As catro propostas musicais con máis likes e comentarios dende este venres 4 e ata o 11 de abril no perfil do Extruga Festival en redes sociais converteranse nos finalistas, que se anunciarán o día 13.

Un xurado de membros do evento elixirá á banda, solista ou DJ gañadora. Polo de agora xa hai máis de 50 artistas inscritos de lugares como Galicia, Portugal, Barcelona, Valencia ou Murcia.

Contenido patrocinado