A música e cultura urbana tomaron un ano máis Verín grazas ao Extruga Festival

EVENTO DE DÍA

O sétimo Extruga Festival volveu converter Verín na capital galega da cultura e a música urbana nunha xornada interdisciplinar chea de creatividade

A Liga Xunta de break dance foi moi seguida. | Xesús Fariñas

O Extruga Festival deu comezo o sábado á mañá cun escape room urbano na Praza do Concello, organizado por Camiñando Cara Atrás, o proxecto da historiadora e futbolista Ana Rivera, arredor dos xesuítas.

Ao mesmo tempo, a Praza Maior acolleu un obradoiro de break dance mentres que o Bar Zurria se animaba coa sesión vermú a cargo de Revolutionary Brothers ft. King Konsul.

Á tarde, A Preguiza foi o corazón do festival, cheo de actividades: un obradoiro de parkour para a cativada, as batallas de rap da man da Ceiba Rimas, a Liga Xunta de break dance e o obradoiro de Livrecorte.

Tamén houbo mercadiño, e as foodtrucks funcionaron ata ben entrada a madrugada.

Concertos gratuítos

Pero o prato forte foron os concertos á noite, desta vez de balde, que fixeron vibrar ao público. Polo escenario pasaron artistas como 9Louro, Kid Mount, Largo da Cumbia, o verinense Pappaquino, El Virtual, OBF & Sr. Wilson e Gea.

Unha noite chea de ritmo que reafirma o Extruga Festival como referente en Verín e Galicia.