“Ondas Mur”, o CIM de Verín estrea un podcast sobre corresponsabilidade

Baixo o nome “Ondas Mur”, no podcast do CIM darase información das actividades e proxectos que están en marcha nos concellos de Castrelo do Val, Verín e Vilardevós e do propio CIM relacionados coa corresponsabilidade e a conciliación familiar e laboral.

O primeiro programa do podcast, que está dirixido pola xornalista Sole Figueroa, ten por obxectivo dar a coñecer de cerca o propio CIM, como funciona, quen traballa nel e as iniciativas que se tratan de impulsar cada ano. Tamén se fala dos programas de ocio educativo do Centro de Desenvolvemento Rural (CDR) Portas Abertas e da ludoteca da Federación Provincial de Mulleres Rurais de Ourense (Femuro).

Nos episodios tamén se poden escoitar as opinións de pais e nais usuarios, mesmo dos seus cativos, coñecendo nas conversas as súas opinións sobre a corresponsabilidade e como se aplica na súa vida. O segundo programa está centrado no Concello de Castrelo do Val e o seu programa de conciliación, e os seguintes xa están en marcha en Verín e Vilardevós. En total, nestes primeiros episodios escoitaranse as voces dunha quincena de homes e mulleres.

Dispoñible en redes

Os primeiros programas poderanse escoitar a través das ligazóns no Instagram (@mancoverincim) e na canle de YouTube do CIM de Verín (@c.i.m.comarcaverin1319). As responsables do CIM animan a participar nestes podcast e a enviar opinións e ideas a través do correo: podcastondasmur@gmail.com. Esta iniciativa está financiada pola Consellería de Política Social e Igualdade e o Ministerio de Igualdade.