O PP de Verín alerta de que un novo cambio na gardería pon “en perigo” a subvención

UBICACIÓN

O Partido Popular de Verín, a través da súa voceira, Lara Da Silva, alerta dunha nova “ocurrencia” coa gardería

Sonia Arias, Beatriz Blanco, Lara Da Silva e Aitor Álvarez, este xoves en Verín. | La Región

Segundo os populares, agora o grupo de goberno PSOE-BNG ten previsto ubicar a escola infantil no espazo “das actuais piscinas municipais na Granxa”, no canto do patio interior do CEIP Princesa de España, cuxa desafectación xa foi aprobada nun pleno.

Para o PP, esta decisión pon “en perigo” os fondos concedidos pola Xunta para a construción da gardería “hai 8 meses”, e que deben xustificarse “antes do 5 de decembro”.

Ademais, de levarse a cabo as obras, estas non poderían iniciar “ata setembro, cando a veciñanza deixa de desfrutar das piscinas”, e agardan que a escola infantil non supoña “derrubar as piscinas actuais”. Porén, esta situación expón para o PP a “desidia, improvisación e falta de xestión do bipartito”.

Os populares comentaron ademais un informe elaborado pola intervención e tesourería do Concello a raíz da liquidación do orzamento, na que se poñen de manifesto “numerosas irregularidades no ámbito económico”, e apuntaron a que se aproban recoñecementos de crédito “sen ter achegas nin fondos para pagalas”.

Amosan a súa preocupación, xa que o informe “evidencia” que a interventora e a tesoureira “non teñen acceso a toda a documentación nin poden fiscalizar porque os órganos xestores non colaboran con elas”.

Piden a intervención

Lembraron asimesmo un escrito remitido por Facenda, no que advertía que o Concello “non cumpre co periodo medio de pago a proveedores”, carece “dun plan de tesourería” e aumenta “a débeda viva”, malia que “non se lle envía a documentación, nin fielmente nin en prazo”.

Por todo isto, solicitaron de novo a “intervención” de Facenda, dado que isto “ímolo pagar todos”.