O PP de Verín tilda a política municipal de persoal de “clientelar e interesada”

Así se expresou este mércores a voceira popular, Lara Da Silva, en referencia a unha recente sentenza que estima unha demanda interposta ante a xustiza polo sindicato da CIG, e que impugnou a contratación dunha praza de traballadora social do Servizo de Axuda no Fogar do Concello.

Da Silva afirmou que o goberno municipal dedícase a “buscar tódolos camiños posibles para non facer cumprir a lei, saltándose os principios básicos, como a concurrencia pública”, ademais de vulnerar, no seu xuízo, “os principios de igualdade, mérito e capacidade de tódolos verinenses”.

Tamén salientou que a política de persoal do Concello fora sempre “caótica”, e que se empregan mecanismos “denunciados polos habilitados nacionais e os informes de Secretaría e Intervención, ao apreciar graves irregularidades”.

Ademais engadiu que nunca houbera tantas “denuncias por parte dos sindicatos ”por productividade, con sentenzas en conta”, e que en dez anos “non cubriron as prazas máis importantes”.

Críticas á seguridade

A voceira da oposición aludiu á “crecente inseguridade” que vive segundo ela a vila, debido a que “hoxe só hai en servizo seis axentes, cando hai anos houbo 18 prazas de policía municipal”.