O tempo da malla volveu á Aira do Verano da Mezquita

CICLO DO PAN

A veciñanza do concello desfrutou un ano máis facendo este labor do ciclo do pan de xeito tradicional, e que tamén ten moito de acto social

Voluntarios do programa realizado en torno ao proxecto do centeo, e coas vestimentas tradicionais.

Por quinto ano, A Mezquita celebrou o pasado luns a súa Festa da Malla, na que se levou a cabo esta parte do ciclo do pan. Nos anos 60 e 70 a malla era, máis que unha tarefa, un dos encontros sociais máis esperados de todo o ano.

Veciños e voluntarios, vestidos ao xeito tradicional, con camisas brancas e panos vermello, mallaron á tarde na Aira do Verano.

“Para mallar, hai que segar o pan e deixarlle o grao. Aquí ségase cunha máquina máis tradicional, que emprega uns elementos pequenos chamados ‘mollos’. Despois de facer a sega, átase a palla. E por último faise a carrexa, que consiste en apañar a palla, neste caso nós facémolo nos remolques”, explica Rafael Pérez, alcalde do Concello.

A malladora tradicional, coa palla baixando polo espallador.

A recuperación deste labor tradicional permite elaborar pan orixinario do municipio, cun proceso 100% artesanal, e que a veciñanza puido degustar este ano na V Feira de Artesanía “Artesanato”.

O Concello da Mezquita leva catro anos realizando o ciclo do pan de forma tradicional, grazas ao cultivo de centeo local, cuxo grao está cientificamente datado coma o máis antigo da Península Ibérica.

Gorros de palla

A velada estivo amenizada polo grupo Tanto. Ademais tamén houbo unha demostración da elaboración de gorros de palla tradicionais, “sancosmeiros”, por parte de Trenzarte.

Contenido patrocinado