O Esquecemento é identidade e lembranza

Xinzo de Limia continuou o seu regreso ó pasado nunha xornada ateigada de actividades, na que non faltaron nin música, nin xogos, nin os desfiles.

Sen dúbida, un dos momentos destacados do “saturnii” foi a Recepción de autoridades e tropas estranxeiras, un acto protocolario que se acompaña ca entrega dos Premios Bispo Idacio.

Recibíronse ás tropas de Lucus Augusti, Asturica Augusta e Cartago Nova, ademais dos representantes de outras festas de recreación histórica, como a Feira Medieval de Mondoñedo ou o Arde Lucus, xunto cos representantes da Asociación Española de Fiestas y Recreación Histórica.

Nas verbas dos interlocutores primaron as felicitacións e agradecementos. Felicitacións por estes 25 anos, que malia que non foron doados, permitíronlle ós limiaos manter a lembranza duns feitos que marcaron o seu porvir.

E agradecementos dos moitos invitados a este Annus Argenteus, xa que a Festa do Esquecemento non só é das primeiras que se adscribiron á asociación de recreación histórica, senón que grazas a ela deron comezo outras moitas, como o Arde Lucus.

Nunha cousa coincidiron tanto Antonio Madrid, o presidente da asociación española de recreación, e Amador Díaz, alcalde de Xinzo de Limia, e é que “non se entende como a Festa do Esquecemento aínda non foi declarada de Interese Turístico”. Apuntárono ambos.

Pola súa banda, a Civitas Limicorum tampouco se esqueceu de nada destes 25 anos: nin dos seus socios, nin dos seus triunfos, nin das dificultades.

Este ano, o premio Bispo Idacio recibírono de forma colectiva tódalas persoas que participaron na organización da festa ó longo destes anos. Foi un acto cheo de bágoas para recordar ós que xa non están presentes pero sempre formarán parte da historia de Xinzo, e no que se reflectiu o incansable traballo de unha morea de persoas que apostaron por protexer e manter viva unha parte inequívoca da identidade limiá.

Xa logo do xantar, volveu comezar a programación: xogos olímpicos, pasarrúas, concertos, espectáculos itinerantes, gladiadores... Ata chegar ás 20,00 horas, cando as lexións de Décimo Xuño Bruto percorreron a vila, antes de que comezase o Gran Circo Romano.

Facía máis dunha década que a Limia non acollía este espectáculo, que fixo o deleite de máis dun milleiro de asistentes ansiosos por ver ós grandes gladiadores baterse -case- a morte e as perigosas carreiras de cuadrigas.