Os pataqueiros da Limia valoraron os resultados do estudo SoildiverAgro

O estudo SoildiverAgro é un proxecto de investigación que pretende dotar ós agricultores de ferramentas para traballar cara unha agricultura máis sustentable, co obxectivo de innovar nas técnicas agrícolas, mellorando a rendabilidade das explotacións e a calidade do solo.

O Inorde vén de acollerr a presentación das conclusións ós pataqueiros da Limia por parte de David Fernández, director do Instituto de Agroecoloxía e Alimentación da Universidade de Vigo. Expuxéronse os resultados, entre os que salienta o uso da planta trampa como técnica biolóxica para reducir o número de quistes de nemátodos que afectan as patacas.

Esta enfermidade reduce a produción do tubérculo, obrigando a declarar as fincas en cuarentena se supera determinados niveis, prohibindo sementar patacas nelas. “A pranta desenvolveuse ben, reducindo considerablemente a incidencia desta afección, evitando o desenvolvemento da enfermidade, o uso de nematicidas de síntese químico, que son moi tóxicos, e que se declaren as fincas en cuarentena”, explicou David Fernández.

Tamén se ofreceron resultados sobre a introdución de legumes nas rotacións das fincas. Incluíuse o chícharo nas rotacións, conseguindo unha redución no aporte de nitróxeno de orixe químico e pequenas melloras na produción, preto dun 10%.