"Aventuras Scouts", campamento para espertar o espíritu explorador e creativo

O Grupo Scout ILEX 695 organiza un novo campamento de verán, que nesta ocasión se desenvolverá en Entrimo entre os días 15 e 26 de agosto, para garantir un verán cheo de experiencias e diversión para estimular o crecemento persoal de rapaces e rapazas de 8 a 14 anos.

Este ano esta entidade xuvenil organiza seu campamento de verán no recinto de Penedos de Xacinto, en Entrimo, ás portas do Parque Natural Baixa Limia e Serra do Xurés e Reserva da Biosfera Transfronteiriza Gêres-Xurés, con grandes valores naturais dos que poderán aprender e gozar as rapazas e rapaces que participen desta experiencia.

As actividades reunirán a 50 nenas e nenos de entre oito e catorce anos. O campamento divídese en dúas quendas. A primeira comezará o día 15 e está destinada á Tropa, grupo que comprende as idades de entre 11 e 14 anos; mentres que os rapaces e rapazas da Manda, de 8 a 11 anos, comezarán o campamento o día 19. As actividades de ambas rematarán na mesma data, o sábado 26. O prezo será de 169 euros para os 12 días de campamento dos rapaces maiores, e de 125 para os 8 días de duración para os máis pequenos.

O prazo de inscrición está aberto na web http://scoutsourense.org/ ata o próximo martes 20 de xuño para todos aqueles rapaces e rapazas que desexen gozar desta experiencia ao aire libre.