A diversión multiplícase na biblioteca de Seixalbo

Actividades na biblioteca do CEIP Seixalbo

O colexio de Seixalbo iniciou este curso sen o servizo de biblioteca por unha boa causa. O espazo, moi querido entre a comunidade educativa, foi renovado completamente para ampliar os seus servizos e modernizar as instalacións. Finalmente o pasado mes de febreiro, os alumnos xa puideron comezar a gozar da nova biblioteca e hoxe, tres meses despois, converteuse nun lugar máis querido aínda.

As obras, financiadas pola Consellería de Educación, non foron pequenas, pero pagaron a pena. Consistiron na demolición de tabiques de separación de locais destinados a antigos laboratorios e almacéns para poder acadar un uns 203 metros cadrados cheos de libros, actividades, aprendizaxe e diversión.

Así, hoxe os alumnos teñen a súa biblioteca como un espazo no que, ademais de mergullarse nos libros que xa poden levar en préstamo de novo, tamén xogan cos diferentes xogos e nos recreos a actividade non cesa. Hai recunchos para tódolos gustos e un dos máis especiais é o burro con disfraces que lles permite crear grandes historias.

Alí desenvólvense tamén as actividades dos Polos Creativos e mesmo se animaron a fabricar o seu propio satélite para enviar ó espazo exterior, aproveitando que o universo é o tema central do seu proxecto global deste curso. Pero aí non remata todo… A nova biblioteca tamén ten un estudio de radio, onde os alumnos elaboran os seus propios podcast.