O periodo de adaptación de Educación Infantil en Franciscanas
Teñen só tres anos de vida -mesmo dous no caso daqueles que están de aniversario a final de ano- pero son expertos en adaptarse ás rutinas. As miradas dos novos cursos están sempre postas neles, nos seus choros e emocións polo novo mundo que se lles presenta. E fano de marabilla.
O periodo de adaptación dos máis novatos dos colexios ten cores, formas e debuxos. Son semanas de explorar a aula, descubrir os xoguetes e mentalizarse de que inician unha nova etapa nas súas vidas. “Gústame xogar, pero tamén imos ter que estudiar”. Así de animada o comentaba Julia, unha pequena de Franciscanas que, xunto ós seus compañeiros xa están afeitos ó son do despertador, a vestir o mandilón e ós novos horarios que, de luns a venres, lles indican que xa son “maiores”.
E as mestras de tres anos xa están tamén encariñadas con estes novos grupos de alumnos ós que agora lles teñen que sentar as bases da aprendizaxe, comezando por cousas tan importantes como as cores que enchen as súas aulas.
Ademais, os alumnos que comezan este ano -o terceiro curso marcado pola pandemia- fano dentro dunha lixeira recuperación da normalidade. Ademais de diminuír a distancia social, a partir de agora os escolares das aulas poden tamén compartir o material, a diferencia do que acontecía o pasado curso. Esta medida facilita o xogo e mellora a convivencia duns alumnos que están agora descubrindo un novo mundo.
Contenido patrocinado
