De Xinzo a Compostela: unha meta moi merecida

A viaxe comezaba o 28 de outubro. Ese día, dende Xinzo de Limia, os pequenos peregrinos do colexio Carlos Casares vestían a súa capa e o seu sombreiro para dar o primeiro paso dun Camiño de Santiago moi especial. “Camiñando en igualdade” foi o lema que non abandonaron en ningunha das seis etapas que realizaron nestes meses e que tiveron nesta pasada fin de semana o seu premio final.

Guiados polos seus profesores Sonia, Rosa, Manoli, Sandra, Chus, Rochi e Roberto e acompañados neste último tramo pola alcaldesa de Xinzo, Elvira Lama, a Praza de Mazarelos viu achegarse a un grupo moi especial formado polos alumnos de sexto de Educación Infantil e quinto de Educación Primaria do colexio limián, que percorrían os últimos pasos da súa peregrinación moi emocionados e contentos

Agora, coa compostela que acredita a súa viaxe xa na casa, os pequenos encaran a recta final do curso lembrando todo o que aprenderon durante a peregrinación, durante a que visitaron lugares como Ourense, Oseira ou Silleda, descubrindo a historia de cada un.

Dende o centro educativo agradecen tamén a participación das familias por compartir con eles a ilusión dun proxecto que tiña por obxectivo reclamar a igualdade de oportunidades e inculcar valores vitais nos máis novos.