Os xogos non teñen idade no Ruxidoiro

Co obxectivo de ampliar a formación do seu alumnado o colexio O Ruxidoiro de Barbadás celebrou as súas xornadas interxeneracionais. Trátase dunha iniciativa que reúne ós avós e ós maiores das residencias de ancianos próximas co alumnado do centro educativo.

Ata alí, os maiores achéganse con xoguetes cos que se divertían na súa infancia e ensínanlle ás novas xeracións a xogar con eles. Foron xornadas cheas de emocións, convivencia e compromiso co co entorno. Foron uns días moi especiais para todos, nos que xogaron, compartiron experiencias e aprenderon moito uns dos outros.

Debido ó éxito da iniciativa, dende o colexio de Barbadás xa están pensando en ampliar as xornadas para o ano que vén, pois este ano foron tan divertidas que se lles fixeron curtas, tanto ós maiores como ós pequenos, que descubriron xogos moi divertidos e completamente analóxicos nunha época na que dominan as pantallas.

Entre os xogos novos que aprenderon os alumnos do Ruxidoiro, os zancos, a roda ou a rá foron os máis divertidos, unha proba de que non sempre fan falta aparellos moi sofisticados para pasar bos momentos entre amigos. Porque iso é o que son agora os maiores e os veciños máis novos de Barbadás, despois de compartir unhas xornadas moi enriquecedoras e inesquecibles.