Sobradelo celebrará o XII Tangaraño Cultural

Este sábado 31 de maio, a pequena aldea de Sobradelo, no Concello de Xunqueira de Ambía, volverá encherse de vida, cor e emoción coa celebración do XII Tangaraño Cultural, unha cita anual xa consolidada no corazón do rural galego. Entre montes e camiños antigos, a poesía, a música, a fotografía, a artesanía e as múltiples formas da creación artística danse a man nun encontro que é moito máis ca un festival: é un espazo de amizade, solidariedade e boas prácticas.

O mercado de artesanía local será outro dos grandes atractivos desta edición, achegando ao público produtos únicos elaborados por artesáns locais.

A organización destaca o compromiso do Concello de Xunqueira de Ambía, que ano tras ano apoia esta iniciativa. Tamén contan coa complicidade dos concellos veciños de Baños de Molgas e Vilar de Barrio, que ceden espazos nas súas localidades.