Música, tradición e lume na fornada de Niñodaguia

Os fornos de Niñodaguia volveron a prenderse onte para revivir con orgullo a vella tradición da parroquia. Unha cita festiva na cal veciños e visitantes viaxaron a principios do século XX para poñer en valor a olería tradicional, pero tamén a música e a confraternización veciñal.

Os asistentes acudiron vestidos de época atendendo as suxerencias da organización da xornada, impulsada polos veciños xunto coa Asociación Amigos do Barro e o apoio do Concello de Xunqueira de Espadanedo, Artesanía de Galicia e a Deputación de Ourense, pondo o broche a unha xornada que maridou música, arte e gastronomía. A celebración etnográfica comezou no 2019 e, dende 2023 enmarcarse no Día Europeo de Artesanía.

A festa etnográfica uniu a veciños e visitantes ao redor dos vellos fornos tradicionais

Tras a inauguración oficial, en presenza das autoridades locais e autonómicas, os actos trasladáronse a celo aberto. O tempo acompañou a procesión das apañadeiras, as mulleres que cun equilibrio e desfilar envexable, portaron sobre as súas cabezas o froito dos cacharreiros, as olas, canecos, fontes ou barreños caracterizada polo barro de cor amarelo, cara os fornos. Como se dun tetris se tratase, e cun coidado meticuloso, os homes do lugar foron os encargados de colocar peza a peza os distintos cacharros nos vellos fornos de pedra.

Unha vella tradición na que no faltou a música tradicional cun fiadeiro que se prolongou pola tarde con grupos tradicionais chegados dende diferentes puntos da provincia e un obradoiro de baile impartido por Artur Puga. O programa festivo incluíu unha visita guiada ao Museo de Niñodaguia e un xantar tradicional con callos como prato principal ao que, pola tarde-noite, se lle sumou o porco asado, en formato bocadillo.