Elvira Pérez, pastora da Bola, exemplo de muller agrogandeira no rural ourensán

A comarca de Terra de Celanova protagoniza a campaña “8M, mes a mes” da Deputación, que dedica o seu recoñecemento de decembro ás mulleres que traballan no sector agrogandeiro baixo o lema “As pastoras da igualdade”. A homenaxeada é a pastora Elvira Pérez Vilanova, nada na Bola, pola súa traxectoria marcada polo esforzo, a constancia e o arraigo ao territorio, valores que simbolizan o papel esencial das gandeiras na provincia.

Elvira Pérez leva dende 1994 á fronte dunha explotación que hoxe conta con 190 ovellas, froito dun traballo diario no que “cómpre erguerse de madrugada e non hai días libres”. Como ela mesma explica, levantar unha granxa dende cero require un gran investimento de tempo e recursos, ademais dunha vontade firme para superar as dificultades dun sector esixente e poucas veces recoñecido.

A deputada de Igualdade, Teresa Barge, destacou que “manter os rabaños nos montes” é hoxe máis importante ca nunca, “especialmente trala vaga de lumes vivida este último verán na provincia”. Subliñou que o traballo das gandeiras non só “garante alimento e vida no rural”, senón que tamén contribúe de “á prevención dos incendios, mantendo limpos os montes e protexendo o patrimonio natural”.

“Loita pola igualdade”

Barge reivindicou ademais o papel das gandeiras como “un acto de resistencia e de amor pola terra”, lembrando que grazas a elas “os montes seguen vivos, as aldeas manteñen a súa identidade e a provincia conserva a súa forza”. A deputada insistiu na necesidade de que as administracións poñan en valor este labor, porque estas mulleres representan tamén “a loita pola igualdade e pola dignidade do noso rural”.