Os Blancos reformará as beirarrúas do centro do pobo

Por medio dun investimento de 80.000 euros achegado pola Consellería de Medioambiente, Territorio e Vivenda e polo propio Concello, Os Blancos verá renovadas as beirarrúas do centro do municipio, que se atopan, actualmente, moi deterioradas. Do mesmo xeito e tal e como explican dende a Xunta, ditas beirarrúas presentan desniveis que ocasionan que a auga se estanque e non evacúen de xeito correcto.

A actuación de mellora prolongarase durante cinco meses e terá, en definitiva, como obxectivo mellorar a accesibilidade dos viandantes e renovar o aspecto da zona.

AS OBRAS

As obras previstas consistirán na demolición e retirada das lousas da beirarrúa -moitas das cales están soltas e rotas- e no levantado do bordo actual para, a continuación, volver pavimentar, colocar lousas de formigón hidráulico e novos bordos de granito. Ademais e co fin de resolver o problema que supón que as baixantes das cubertas evacúen directamente nas beirarrúas, acometerase a súa conexión coa rede de pluviais que vai pola marxe da vía a través dunha tubaxe de PVC.

Dende a Consellería de Medioambiente tamén informaron este martes da licitación das obras para a reforma da praza da Constitución, da zona do mercado e da biblioteca do Concello de Bande.