O CDR O Viso aposta polos itinerarios de inclusión laboral

O CDR O Viso continúa desenvolvendo os itinerarios de inclusión social e laboral, mediante os cales apoiaron a máis de cen familias ó longo do último ano en situacións vulnerables. Entre as persoas con permiso de traballo activo que participaron neste proxecto, acadaron unha taxa de empregabilidade do 60%, o que supón un 30% do total no que se inclúen as persoas que non contaban cunha situación regular.

Durante os máis de nove meses que adoita durar o programa, a maioría das persoas reciben máis de dez sesións de atención presencial, complementadas cos seguimentos necesarios. Esta área de inclusión conta con profesionais de distintos eidos ó servizo das persoas e familias en situacións desfavorecidas.

Paula Blanco, traballadora social do CDR O Viso, explica que “construímos plans individualizados para poder adaptarnos ás circunstancias específicas de cada persoa ou familia”. Camilo Vila, pedagogo do CDR O Viso, engadiu que “polo que máis apostamos é polo traballo interdisciplinar, todos participamos na avaliación de tódalas situacións”.

Ley de estranxeiría

“Estamos nunha situación de incerteza pola transición”, comenta Camilo sobre a nova normativa, “é lóxico que haxa dúbidas, pero a xente que está chegando á nosa comarca está en disposición de buscar emprego”, xa que a maioría chega nunha situación laboral regularizada dende o primeiro momento. “Son persoas que lle veñen xenial ó mercado laboral da Limia, porque tapan as eivas que temos”, aclarou Camilo. O sector primario e a construción son os mercados nos que máis traballo atopan.