A comarca da Limia recibiu 500.000 euros do Camiña Rural

A comarca da Limia recibiu nesta convocatoria do Plan Camiña Rural -anteriormente coñecido como Plan Marco- da Xunta de Galicia preto de 500.00 euros, repartidos en dez concellos, para a ampliación, mellora, ou mantemento dos camiños municipais que dan acceso ás parcelas agrícolas.

Onte pola mañá, o delegado da Xunta de Galicia en Ourense, Manuel Pardo, visitou unha destas actuacións no concello de Sarreaus, onde estivo acompañado do alcalde, Gumersindo Lamas, xunto a outros concelleiros. Pardo detallou que no caso deste municipio, a Consellería do Medio Rural a través da Axencia Galega de Desenvolvemento Rural, destinou 48.817 euros, para a mellora de camiños municipais de acceso a parcelas agrícolas.

“As infraestruturas viarias son de vital importancia para as contornas rurais, xa que xeran cohesión social e territorial, mellorando as condicións de vida e traballo nestas zonas”, destacou Pardo. Os outros concellos beneficiados da Limia foron: Porqueira, Os Blancos, Vilar de Barrio, Baltar, Rairiz de Veiga, Sandiás, Trasmiras e Xinzo de Limia.

O alcalde de Sarreaus destacou que esta carreteira, “a que vertebra o acceso a Sarreaus dende esta parroquia e que une dúas carreteiras da Deputación”, é un dos camiños que “máis temos que coidar”. Lamas destacou as axudas da administración para o mantemento destas carreteiras, xa que “son camiños de tránsito agrícola e hoxe os tractores son grandes e os remolques de moito peso, e polo tanto hai que estar tódolos anos facendo mantemento”. O alcalde tamén incidiu que estas actuacións son fundamentais para o traballo agrícola no Concello.