Comezan as obras das beirarrúas da rúa Dous de Maio en Xinzo de Limia

Esta semana deron comezo as obras das beirarrúas da rúa Dous de Maio, que inclúen tres ramplas de acceso para favorecer a mobilidade e que dende o grupo municipal socialista apuntan que “levan moitos anos sendo unha reclamación da veciñanza”.

Dende o PSdeG-PSOE de Xinzo lembran que foi unha obra “deseñada para acometer coa maior urxencia durante o anterior mandato, debido ao derrube que presentaba a beirarrúa superior, con máis de 50 anos de construción”.

“Este ano fíxose realidade a través do Plan Cooperou 2024, un plan que foi negociado polo grupo provincial socialista co novo presidente da Deputación de Ourense”, explica a voceira do PSdeG-PSOE en Xinzo Elvira Lama. Neste senso, a ex-alcaldesa pon de manifesto que estamos ante un plan “destinado a tódolos concellos, con criterios de reparto xustos e que remata coa discriminación existente durante décadas no ente provincial e que no caso de Xinzo a achega é de 348.000 euros”.

Un proxecto deseñado a dobre altura con beirarrúas paralelas, unha no borde da calzada por onde vai o abastecemento e outra na saída das vivenda, por onde irá a tubaxe de saneamento. As obras tamén contemplan tres pasos elevados sobre unha calzada que recibira tratamento de dobre rego, así como zona axardinada nos desniveis da beirarrúas.