Curso en Xinzo de “Actividades Auxiliares de Agricultura”

O vindeiro día 13 dará comezo no Centro Agrogandeiro de Xinzo un curso de Actividades Auxiliares de Agricultura. O centro limiao, dependente do Inorde, conseguiu a acreditación para impartir os certificados de profesionalidade nesta especialidade, así como na de Agricultura Ecolóxica.

O obxectivo desta primeira acción formativa será executar operacións auxiliares en cultivos agrícolas seguindo instrucións de superiores ou plans de traballo, e cumprindo as medidas de prevención de riscos laborais, calidade e protección do medio ambiente.

A formación, que se estenderá ata o 19 de abril do 2023, constará de 388 horas en total que se repartirán en horario de mañá de 09,00 horas a 14,00 horas. O módulo de prácticas profesionais non laborables do curso durará 40 horas.

A acción formativa estará dirixida prioritariamente a desempregados, aínda que poderán entrar ata un 25 por cento de traballadores. As prazas dispoñibles que se ofertan son 15 e os participantes non precisan ter titulación de acceso. Unha vez finalicen o curso disporán dun certificado de profesionalidade de Nivel 1.

O curso habilitará aos participantes para traballar como peóns agrícolas, agropecuarios, de horticultura, de fruticultura, de cultivos herbáceos, de flor cortada, de xardinaría, de viveiro ou de centros de xardinaría