O Día da Xuventude encheu Xinzo de actividades

A mocidade que ata alí se achegou puido desfrutar de varias actividades pensadas para idades comprendidas entre os 12 e 35 anos. Os menores de 12 años que asistiron acompañados divertíronse nun espazo de construción pensado para a eles.

Esta festa vespertina é unha proposta da Xunta a través da Consellería de Cultura, Lingua e Xuventude, en colaboración co Concello de Xinzo, e que conta ademais co financiamento do Ministerio de Igualdade dentro do marco do Plan Corresponsables.

Os distintos xogos de entretemento, todos de balde, incluíron un xogo de escape e realidade virtual no taller de concienciación ambiental, tiro con arco en lecer educativo, un obradoiro de arte colaborativo a través do graffiti ou unha demostración culinaria no denominado espazo de gastronomía saudable.

O obxectivo da tarde foi a de ofrecer alternativas de ocio saudables e tamén educativas por toda Galicia, xa que o Día da Xuventude estase a celebrar en máis de 30 concellos gallegos.

Ricardo Sieiro, concelleiro de Participación Cidadá, Mocidade e Festas de Xinzo, destaca que o Concello limiao busca con este tipo de eventos “fomentar outro tipo de ocio, máis saudable, con outro tipo de actividades que, aparte de que sexan lúdicas, tamén sexan formativas e interesantes para toda a mocidade”. O desexo do concelleiro sería que este Día da Xuventude “se repetise ao longo do ano, xa que me parece moi interesante”.

Por último, o fin de festa contou cunha actuación musical a cargo do DJ Pablo Seguín, e que fixo as delicias e puxo a bailar aos alí presentes.