O GDR Limia Arnoia contrata persoal técnico para o proxecto Leader

O Grupo de Desenvolvemento Rural (GDR) Limia Arnoia vén de abrir a convocatoria para a contratación de persoal técnico para o programa Leader 2023-2027 no territorio, incorporándose ó equipo encargado de xestionalo. O GDR abre esta convocatoria para reforzar o equipo actual cunha persoa con capacidade para acompañar, asesorar e seguir os proxectos que se presenten ó programa.

A entidade busca cubrir unha praza de técnico durante unha excedencia do titular, para traballar na oficina de Celanova con posibilidade de desprazamento ás sedes de Allariz e Xinzo de Limia.

O prazo para presentar as solicitudes remata o vindeiro 29 de setembro, e poden realizarse de xeito telemático a través do correo electrónico info@limiaarnoia.gal.

Programa LEADER

O proxecto “Ligazón Entre as Actividades de Desenvolvemento da Economía Rural” (Leader) é unha política da Unión Europea destinada a manter vivas as áreas rurais, adaptada ás diferentes realidades rexionais e co obxectivo de mellorar a competividade do sector agrario e forestal, mellorar o ambiente e o medio rural, a calidade de vida e diversificación da economía rural, a través de estratexias que favorezan condicións para crear e manter emprego no rural e a ocupación sostible do territorio, prestando especial atención ós colectivos máis desfavorecidos.

O proxecto pretende que as persoas destes territorios se convertan en “protagonistas do seu propio desenvolvemento”.