O IES Lagoa de Antela rematará o proxecto “Refuxios” este mércores

O IES Lagoa de Antela organiza este mércores unha xornada orientada á construción de dous refuxios, elaborados con vimbio, que servirán como espazo de lecer e observatorio de aves. Trátase dunha actividade dirixida á mellora da franxa traseira do patio do centro educativo mediante a creación dunha área bio-inclusiva cunha pequena zona húmida, enmarcado no proxecto “Refuxios”.

Ao longo do proxecto creouse unha charca xunto con diversas estruturas para dar refuxio tanto aos animais como ás persoas. O proxecto “Refuxios” comezou o 1 de abril de 2024 e ten unha duración de 11 meses, polo que se atopa na súa fase final e rematará coa presentación das estruturas de vimbio que se construirán nesta xornada mediante técnicas de cestería. Participarán alumnos do centro e as súas familias, e tamén participarán alumnos do IES Cidade de Antioquía.