Lodoselo acollerá un Concilia de verán rural para os nenos

O Concilia Rural de Lodoselo abre as súas portas unha vez máis para ofrecer ás nenas e ós nenos a oportunidade de explorar, aprender e compartir nun entorno enriquecedor.

“Baixo o lema aprender a ensinar para vivir e compartir, o Concilia de verán de Lodoselo promove valores coma o respecto, a colaboración e o amor polos animais, as plantas e as persoas”, comunican dende o Centro de Desenvolvemento Rural (CDR) O Viso, organizador do evento.

“Fomentan un ambiente de apoio e cariño para que os pequenos se sintan parte dunha gran familia, onde a empatía e o respecto polos tempos e ritmos propios de cada nena e neno son a súa máxima lei”, explican dende o CDR O Viso.

Durante os meses de xullo e agosto, terán a oportunidade de participar en actividades ó aire libre, talleres e momentos de convivencia que fomentarán o desenvolvemento persoal e a conexión co entorno. A preinscripción remata o 1 de xuño. Unha vez remate o prazo da preinscripción, avisarase para que pasen pola oficina do CDR O Viso (sita na Calle Ladeira, número 21, Baixo) para formalizar a matrícula do Concilia de verán, dende o 4 ata o 10 de xuño, ambos días incluídos.

“Sempre fieis ó seu lema, coidarme, coidarte, coidarnos, esperan un ano máis para pasar un verán inesquecible”, expresan dende o CDR O Viso.