As melloras no Castelo de Pena costarán 200.000 euros

A Consellería de Cultura informou este mércores do inicio das tarefas de escavación, conservación e acondicionamento do Castelo de Pena, en Xinzo de Limia. Trátase dunha intervención anunciada a comezos deste verán, que se prolongará durante os vindeiros meses e que se centrará, fundamentalmente, na muralla exterior, unha das zonas que, na actualidade, atópase menos visible. Concretamente, limparase esta estrutura situada nunha zona de forte pendente moi cuberta de vexetación e de restos de derrubes. Os técnicos traballarán para investigar e actualizar a documentación existente neste sitio, ademais de para deixar á vista unha parte importante que permita comprender e explicar o conxunto.

Por outro lado, tamén se actuará sobre o torreón de cara a rematar a súa escavación e conservación.

Logo destes traballos, que ascenderán aos 200.000 euros; acondicionaranse os circuítos de visita ao sitio, de modo que se siga permitindo a correcta circulación dos visitantes ao redor da torre da homenaxe así como o ascenso á plataforma. Do mesmo xeito instalarase unha nova sinalética e habilitarase un código QR para vídeo.