Premio a seis alumnos de Xinzo polos seus relatos de Samaín

Seis alumnos de Xinzo de Limia -catro do Rosalía de Castro e os outros dous do Cidade de Antioquía e do Lagoa de Antela- resultaron premiados no concurso Minicontos de medo de Samaín organizado pola Concellería de Cultura que dirixe Ramiro Rodríguez. O xurado, composto por persoas vencelladas ao mundo das letras e polos directores e directoras dos centros educativos, quixo destacar “a orixinalidade” dos relatos.

Os vencedores serán premiados con vales de compra para adquisición de libros por valor de 50, 100 e 150 euros en función da categoría correspondente. Neste senso, establecéronse dúas, infantil e xuvenil, e tres premios en cada unha delas. Ademais, os galardoados recibirán un diploma e un agasallo orixinal de Limisi nun acto que se celebrará nos vindeiros días.

Na primeira categoría -de cinco a 11 anos- resultaron gañadores e por orde de primeiro, segundo e terceiro posto; Antón Sánchez Joga, Claudia Urones Cid e Gabriela Enríquez Blanco. Todos eles estudan no Colexio Rosalía de Castro. Na categoría xuvenil -máis de 12 anos- foron galardoados Carla Gómez Gómez, do IES Lagoa de Antela; Shaila Franco Morales, do IES Cidade de Antioquía, e Leo Rodríguez Enríquez, do Colexio Rosalía de Castro.

GRAN PARTICIPACIÓN

Dende o Concello de Xinzo de Limia quixeron agradecer aos participantes “o seu esforzo e que dedicaran un anaco do seu tempo a esta iniciativa cultural”. O obxectivo desta proposta foi, tal e como matizaron dende a administración local limiá, “fomentar a lectura entre os máis novos e transmitir a tradición celta do Samaín”. Ademais, dende o Consistorio congratularonse pola “gran participación” que se acadou.