Xinzo cifra en 43.000 os asistentes a feiras e festas

O Concello de Xinzo fala dun verán, en xeral, e dun mes de agosto, en particular, con cifras “históricas” de asistencia aos diferentes eventos programados. Concretamente, dende o Consistorio cifran en 43.000 as persoas movilizadas para o Esquecemento, a Feira do Comercio Local de Prolimia e Alimagro, o último gran evento do verán que tivo lugar a pasada fin de semana no pavillón de deportes.

Segundo datos aportados dende a administración local e achegados pola organización, a Feira da Pataca e da Maquinaria Agrícola recibiu nos seus tres días de duración a 17.000 persoas. Neste senso, estímase que unhas 2.000 degustaron a tortilla xigante de pataca elaborada para a ocasión.

Por outro lado, o Esquecemento, que tamén tivo lugar en agosto, logrou reunir, segundo Civitas Limicorum -entidade organizadora-, a outras 20.000 persoas ao longo da penúltima fin de semana de agosto. Para derradeira reservábase a Feira do Comercio Local de Prolimia que, sempre segundo o Concello, movilizou no pavillón de deportes ao redor de 6.000 persoas.

MEDIDAS

Para favorecer o tránsito de veciños e visitantes, o Concello de Xinzo adoptou a decisión de restrinxir o acceso de coches ás rúas do casco vello durante as fins de semana, unha medida segundo o Consistorio “aplaudida pola hostalaría e que amosou unha imaxe distinta do corazón da vila como espazo para o paseo e o terraceo, incrementando de forma notable o ambiente”. Neste senso, engaden que moitos hostaleiros consultados notaron máis movemento neste periodo que no mesmo antes da pandemia. Do mesmo xeito, aseguran que as sucursais bancarias quedaron sen efectivo durante a fin de semana do Esquecemento e que as ventas nos supermercados da vila incrementáronse tamén nun 20 por cento con respecto ao 2019.

VALORACIÓN DO INORDE

Sobre a Feira da Pataca e da Maquinaria Agrícola tamén quixo facer o Inorde, unha das entidades impulsoras, o seu balance. Así, matizan que a asistencia de público “foi continuada durante as tres xornadas, apreciándose no estand do Centro Agrogandeiro ese fluxo de persoas de ao redor das 2.000 ao longo dos tres días”. O Inorde impulsou unha xornada “centrada na relación da contaminación por nitratos na Limia”.

Por outra banda e pensando nos máis pequenos que visitarían a feira, instaláronse lupas e microscopios cos que poder observar os patóxenos que afectan as patacas.