Xinzo estrea o mercado de economía solidaria

Xinzo de Limia acollerá por primeira vez o Mercado da Economía Social e Solidaria, unha feira que promete ser un punto de encontro para proxectos e iniciativas alternativas á economía menos comprometida.

O evento, que se celebrará o vindeiro 27 de outubro na Praza Carlos Casares, diante da Casa da Cultura, terá lugar de 11,00 a 19,30 horas, e contará con máis de 20 postos de produtos e servizos de proximidade e sostibles.

Este primeiro Mercado da Economía Social abordará diferentes sectores, incluíndo a agroecoloxía, produtos locais, enerxías renovables, economía circular, vivenda colaborativa e economía dos coidados. Desde a organización engaden que o obxectivo principal é dar visibilidade a proxectos que poñan ás persoas e o medio ambiente no centro, creando alternativas ao modelo de consumo tradicional. A programación tamén inclúe unha ampla oferta de actividades lúdicas e culturais para todas as idades, facendo desta unha xornada aberta e atractiva para crianzas e adultos.

O día comezará ás 11,45 horas coa presentación do libro “Pragas e Doenzas” de Rosendo Luis Estévez, seguida da proxección da curta Os Pousos do Café, acompañada dun café ás 12,30 horas.

Ás 13:00, Raquel Queizás ofrecerá o espectáculo de narración oral “A Maleta da Avoa”, dirixido ao público familiar. Pola tarde, a actividade retomará ás 16,00 horas con un café-encontro titulado A Cultura Comunitaria como Resistencia, no que se debaterá sobre a importancia do coidado do territorio a través da cultura. Ademais, pola tarde haberá un espazo para as crianzas con xogos artesanais da cooperativa galega Miudiño.

A partir das 18,00 horas, terá lugar unha cata de chocolates de comercio xusto, e xa ás 19,30 horas, o concerto de Cé Orquestra Pantasma pechará esta primeira edición da feira, organizada pola Rede de Economía Alternativa e Solidaria de Galicia (REAS) e promovida polo Concello de Xinzo de Limia e a Rede Eusumo.