Xinzo recordou a “Manolo Siete Machos" cun partido na Moreira

O pobo de Xinzo rendiu homenaxe onte a unha das persoas máis queridas no municipio e que faleceu no presente ano 2017. Manuel Rudesindo Cuquejo, máis coñecido como "Manolo Siete Machos", presidente da asociación de discapacitados da capital comarcal e tamén do clube de veteranos do Antela Fútbol Club, foi recordado nun partido benéfico que enfrontou á Selección Provincial de Curas cunha formación dos veteranos branquinegros no campo de A Moreira.

O evento de homenaxe comezou pasadas as 18,00 horas da tarde. Unha agrupación de gaiteiros de Xinzo de Limia fixo soar o himno galego antes do encontro ao que asistiron centenares de veciños e tamén membros da corporación municipal, encabezada polo alcalde de Xinzo, Antonio Pérez. Toño Nóvoa, un amigo próximo Manuel, procedeu á lectura dunha emotiva carta antes de entregarlle un ramo de flores á irmá e á sobriña do falecido.

Luis Miguel Gil, concelleiro de Cultura e Deportes, dixo de Manuel que era "unha persoa moi querida que sempre estaba de bo humor e pola que tiña un cariño moi especial".