"Deuses de pedra", quince anos de rodaxe na Raia

O cineasta ourensán Iván Castiñeiras presentou onte en rolda de prensa o seu filme “Deuses de pedra”, situada dentro da Sección Oficial do OUFF . A obra, estreada no prestixioso festival de Rotterdam, é a primeira longametraxe do autor, habitual como director de fotografía noutros traballos.

A rodaxe de “Deuses de pedra” durou quince anos. A protagonista deste documental, Mariana, comeza a metraxe sendo unha nena e a remata cumprindo a maioría de idade.

A historia do filme sitúase entre dúas aldeas da Raia, a fronteira entre Galicia e Portugal, zona na que naceu o director. Castiñeiras salientou que a actividade do contrabando foi o xermolo da obra. “Este filme foi unha forma de entender as miñas raíces. Empecei a investigar sobre os costumes do lugar e o contrabando e ata descubrín que persoas da miña familia se dedicaron a iso”, comentou.

“Deuses de pedra” tamén reflexiona sobre a realidade actual do rural en ambos países. “Entre Portugal e Galicia hai diferencias e ás veces non as hai. A fronteira é permeable, pero o deterioro rural é maior no lado galego. No portugués existe máis vida social. Especulo que, debido a ter máis precariedade, a xente non puido irse. Onde en Galicia vexo soamente a xente maior, en Portugal existen varias xeracións”, sinalou Castiñeiras.