Ruth Gabriel reinvindica ás actrices españolas

A actriz gañadora dun Goya Ruth Gabriel presentou “Mujeres de cine” dentro da programación de encontros literarios do OUFF. A obra rescata a historia e o legado de 30 actrices clásicas do cinema español nacidas entre 1900 e 1965. O libro conxuga relatos inéditos e ilustracións de Vanessa Santos “Fraules” para reivindicar a voz e a presenza a figuras do talle de Carmen Sevilla, Verónica Forqué ou Emma Penella.

Gabriel definiu o seu libro nunha presentación ateigada de xente como unha homenaxe ás grandes referentes femininas da interpretación en España: “30 mulleres que foron, sen dúbida, as influencers da súa época”, sinalou.

Tamén confesou que, inicialmente, estivo a piques de rexeitar o encargo por mor do chamado “síndrome do impostor”. Este sentimento foi amplificado pola súa propia bagaxe familiar, xa que é filla da gran referente da literatura española Ana Rossetti. “Sei cando alguén non escribe ben”, recoñeceu entre risas. Repensou a decisión polo impacto emocional que lle provocaron as ilustracións: “Dixen que non nun primeiro intre, pero me deu moitísima rabia pensar que isto ía estar asinado por outra. Rematou sendo un agasallo marabilloso”, celebrou Gabriel.

A autora puxo o foco na importancia das protagonistas do libro. “Hai actrices que, sen dúbida, me emocionan. Investigar sobre a súa vida foi terapéutico. Como chegaron a ser actrices malia o seu contexto, que moitas veces non foi nada sinxelo. Por exemplo, Marisa Paredes tivo que facer folga de fame durante 15 días”, lamentou.