Mondra puxo a bailar e tocar ao alumnado trivés

Este mércores, o IES Xermán Ancochea Quevedo de Trives contou cunha visita moi especial: o músico Martín Mondragón, coñecido artisticamente como Mondra. O artista compartiu co alumnado o seu proxecto “Mondra na escola”, unha iniciativa didáctica que busca promover e revitalizar a música e o baile tradicional galego entre as xeracións máis novas.

Ao longo da mañá, desenvolvéronse dúas sesións diferenciadas. A primeira estivo dirixida ao alumnado de 2º e 3º da ESO, mentres que na segunda participaron estudantes de 4º da ESO e 2º de Bacharelato, así como un grupo de alumnas e alumnos do CEIP Manuel Bermúdez Couso da vila.

O obradoiro xirou arredor da palabra “foliada”. Mondra comezou preguntando ao alumnado que significaba para eles este termo e, a partir das súas respostas, fixo un percorrido histórico para explicar a súa orixe, a súa razón de ser e a súa evolución ao longo do tempo. A actividade completouse cunha parte práctica do baile tradicional, seguindo os ritmos e pasos que o artista lles ensinaba.