Allariz premia a reciclaxe cun aforro na taxa do lixo

Allariz aprobou en outubro a nova ordenanza que regula as taxas de recollida de lixo, dando cumprimento á Lei 7/2022 e á suba dos custos imposta por Sogama. O Concello ofrece unha redución do 15% na taxa ás persoas ou establecementos que realicen unha recollida selectiva adecuada da fracción orgánica ou fagan compostaxe comunitario/individual, fomentando así prácticas sostibles.

A nova tarifa para vivendas urbanas con recollida tres ou máis días á semana é de 88 euros a estándar e de 74,80 a reducida, mentres que con recollida un ou dous días queda en 70 euros (estándar) e 59,50 (reducida). As taxas para actividades económicas varían segundo a tipoloxía, superficie e frecuencia de recollida.

Para beneficiarse da redución, é necesario presentar unha solicitude antes do 1 de febreiro de 2025, co NIF/CIF da persoa ou establecemento solicitante e unha declaración responsable de compromiso a realizar a recollida selectiva adecuada. O modelo está dispoñible no Concello e na sede electrónica e a solicitude pode realizarse presencialmente nas dependencias municipais, ou online na web allariz.gal.

Ademais, o Concello poderá realizar inspeccións anuais para verificar a continuidade e a correcta separación da fracción orgánica nos establecementos e vivendas que soliciten a bonificación.