A Banda de Allariz emprende unha xira por Barcelona e París

Barcelona e París son os dous destinos que agardan á banda Unión Musical de Allariz, no marco dunha xira do 5 ao 13 de xullo, que tamén promoverá intercambios culturais.

Tralo concerto, hoxe ás 13,00 horas, a banda acudirá a unha recepción institucional con representantes da Xunta de Galicia e do Concello barcelonés no Centro Galego de Barcelona. Alí se celebrará un xantar de irmandamento.

Tras uns días de visita en Barcelona, a banda de Allariz desprazarase ata París, onde teñen previsto actuar en Eurodisney o vindeiro mércores, 10 de xullo.

O día seguinte, xoves, a agrupación musical dará outro concerto na capital francesa, desta vez na céntrica Casa de España. Ámbolos dous concertos serán en sendos auditorios.

A banda viaxa nesta xira con 70 músicos, coa idea de que aprendan e de reforzar os lazos de unión entre todos eles, ademais de difundir o nome da vila de Allariz.