A lenda de Santa Mariña de Augas Santas cautivou a oito ourensáns

Éxito absoluto na primeira convocatoria de "As pegadas de Mariña", a iniciativa promovida polo Xacobeo en colaboración con Xeitura e o Concello de Allariz para dar a coñecer a riqueza patrimonial que perdura no entorno de Santa Mariña de Augas Santas e no xacemento de Armea.

Manuel Gallego, responsable dos proxectos de Turismo en Xeitura explicou que, o feito de ter aforo reducido -oito persoas procedentes de Allariz e, na súa maior parte, da cidade de Ourense-, permitiu chegar a todos os puntos previstos en hora: "Non coñecían a historia e quedaron impactados", asegurou Gallego.

Os puntos visitados ao longo de 100 minutos de actividade foron o Asento de Mariña, o Forno da Santa, as Pioucas e o Carballo da Santa e a parte excavada do Castro de Armea. "O que máis chamou a atención foi o forno, que é unha cripta subterránea e é algo impactante. A lenda conta que nese lugar intentaron queimar a Mariña", explicou o traballador de Xeitura.

Dous personaxes : Visitación Rodríguez, unha lugareña; e un peregrino perdido animaron a actividade: "O peregrino foi aparecendo nalgúns lugares. Resultou moi gracioso", contou Gallego.