Sesenta mozos refuxiados de Mali intentan refacer a súa vida en Allariz

O albergue de Allariz acolle dende hai unhas semanas a 60 inmigrantes procedentes de Mali que chegaron a España a través das Illas Canarias, fuxindo do conflito bélico no seu país. Na vila, centran os seus días na aprendizaxe do castelán e facendo actividades enfocadas a lograr un emprego co que poidan vivir e mandar cartos as súas familias.

Son o segundo grupo de refuxiados derivados deste conflito bélico que acolle o Concello de Allariz no último ano. Chegaron o territorio nacional a través das Illas Canarias e posteriormente foron desprazados ó Balneario de Mondariz, dende onde foron reubicados no albergue da vila alaricana a través da ONG ACCEM. En 2024, o albergue xa acolleu a 25 refuxiados, os cales foron desprazados a distintas partes de España por cuestións laborais e agrupamento familiar.

Estes mozos, de entre 20 e 30 anos, chegaron hai pouco pero xa se tramitou a solicitude de asilo. Teñen unha boa integración no municipio e están recibindo xa clases e formación para a integración laboral, nas que se prioriza a aprendizaxe do idioma, tanto castelán como galego, pois varios deles teñen intención de quedar en Galicia. “Existen peticións de varias empresas dispostas a incorporar a estes mozos”, apunta a alcaldesa.

“Moitos teñen coñecementos de hostalaría, agricultura ou construción e son conscientes da importancia do idioma para poder quedar e poder traballar”, engade Cid, facendo referencia ó interese destes mozos por residir aquí e as posibilidades laborais que teñen.

A alcaldesa visitounos onte acompañada do subdelegado do Goberno en Ourense, Eladio Santos, quen asegurou que “a acollida destas persoas non é un problema, é unha acción de humanidade”.

Traballo das institucións

O coidado e formación destes mozos ven da man de ACCEM, unha ONG que atende labores de acollida e integración de persoas migrantes. Os gastos son afrontados polo Goberno de España e o Concello de Allariz cede o albergue municipal.

Tamén se favorece a integración social, na que “o Concello está permanentemente en contacto con eles e propiciase que teñan relación cos veciños e se incorporen nas actividades da vila, segundo as inquietudes individuais deles”, di Cristina Cid. Segundo comenta, moitos interésanse polo deporte, ben fútbol ou baloncesto, e mostran moito agradecemento pola acollida que están recibindo.