Tito González: “Sería ilusionante ter unha banda municipal de música en Maceda”

Mestre de Acordeón e de Canto tradicional, Juan González cumpriu dúas décadas á fronte da Escola Municipal de Música de Maceda. Entre os seus obxectivos atópase converter esta entidade en comarcal, fundar unha banda de música municipal e reactivar a Coral Polifónica logo de dous anos de parón.

A escola iniciou a súa historia con dous mestres e as especialidades de Acordeón e Piano, pero agora é moito máis.

Si, comezamos con dúas especialidades, incrementamos a oferta con Vento-Madeira e Vento-Metal, ata contar tamén con Pandeireta, Danza, Guitarra e Gaita. Ademais, dende este ano, temos Canto moderno. Contamos con nove docentes e preto de noventa alumnos.

A tendencia sempre foi crecente?

Si e, de feito, agora mesmo temos lista de espera para todas as materias. En danza e pandeireta si é verdade que non temos tanto alumnado porque en Baños de Molgas e Xunqueira de Espadañedo hai escolas e entón está máis repartido.

De que xeito difundides e animades á poboación a tomar parte deste proxecto?

Facemos actividades divulgativas e obradoiros nos colexios co obxectivo de captar novos alumnos. A asignatura de Música e movemento tamén é un xeito de iniciar a nenos que logo escollen novos instrumentos.

Hai tradición musical en Maceda?

Moita e moi grande. De feito, fomos incrementando progresivamente as materias, hai unha coral e unha banda de gaitas. Tamén temos a agrupación “Os do fuelle”, que é un escaparate da nosa escola e na que hai músicos de sete concellos distintos.

Dado ese gusto pola música, non sería posible fundar unha banda de música municipal?

A maioría dos alumnos está nas materias de Acordeón, Piano e Guitarra. Fan falta outras especialidades a maiores que non temos. É algo complicado agora, pero sería ilusionante ter unha banda de música en Maceda. Nunca existiu como tal.

Reactivarase tamén a Coral Polifónica.

Si, a pandemia obrigou a interrumpir a súa actividade, pero en novembro poñerase en marcha e convidamos a todas as persoas que queiran participar nela.

Cal é o seu obxectivo como director?

Sería estupendo que, contando cos concellos limítrofes, a escola puidese ir a máis en materias e alumnos: pasar de ser unha escola municipal, a ser unha escola comarcal. Síntome moi orgulloso de ver como está funcionando o proxecto a día de hoxe.