Uxía Oviedo: “Debemos traballar na mellora dos servizos básicos para frear o descenso da poboación”

Uxía Oviedo (PSdeG-PSOE) ocupará con tan só 23 anos anos a alcaldía de Maceda, converténdose na rexedora máis nova de Galicia. Despois de oito anos de goberno dos populares, será a quenda dun mandato socialista apoiado polo BNG. Nos comicios do pasado 28M, o Partido Popular de Rubén Quintas acadou cinco concelleiros unha cifra insuficiente fronte a suma dos catro acadados polo PSOE e os dous do BNG.

Consideraba a posibilidade de ser a alcaldesa?

A posibilidade sempre existe, porque se non xa nin te presentas. Eu sempre digo que a unhas eleccións sáese a gañar ou polo menos intentar gobernar. Aínda así, é verdade que o final sempre te sorprende. Tes a ilusión, tes as ganas, pero comprobar que os veciños confían en ti é moi gratificante.

Maceda decidiu despois de oito anos un voto maioritario ás esquerdas, como explica este cambio?

Xa fai catro anos, a xente votou alternativas distintas ao equipo de goberno daquel momento pero finalmente non puido ser porque non chegamos a un acordo. Desta vez xa se percibía antes das eleccións que a xente tiña moitas ganas de cambio. Pediuse un aire novo para Maceda.

Estes catro anos serán un traballo conxunto entre o PSOE e o BNG?

Agora mesmo estamos a traballar no pacto e temos as últimas reunións antes do día da investidura. Si que sabemos que vai a haber cambio de goberno e vamos a entrar nós na alcaldía, pero aínda non sabemos como vai a quedar a negociación. Non me quero adiantar aos acontecementos porque estamos en proceso de chegar a acordos.

Cales son as problemáticas que observa actualmente en Maceda?

Temos un concello moi abandonado. As infraestruturas e as aldeas están totalmente esquecidas e incluso a vila tamén está esquecida. Hai que empezar a traballar nos servizos básicos. Vamos a facer uns bos cimentos que nos permitan seguir construíndo. Temos que por en valor o noso, traballar polas nosas aldeas, pola propia vila e polo concello.

Cales son os eixos principais para gobernar os próximos catro anos e mellorar Maceda?

É moi importante intentar frear a perda de veciños. Isto non se pode conseguir se non é logrando uns servizos básicos de calidade. Queremos centrarnos na auga que chega ás casas, na limpeza, nos desbroces ou na loita contra os incendios. Debemos empezar a facer actividades culturais e deportivas. Temos un club ciclista recoñecido a nivel nacional. Temos que darlle un apoio a esa xente, a xente que está en fútbol, en baloncesto ou en ximnasia rítmica. Son moitas as disciplinas que existen e é necesario o apoio para seguir medrando.

Que Maceda lle gustaría ter dentro de catro anos?

Unha Maceda na que todo o mundo poida estar orgulloso da súa terra, que se encontre a gusto e que non teña que deixala atrás. É moi triste observar aldeas que están en risco de quedarse sen veciños e iso é algo que eu quero intentar frear. Estou segura de que o equipo do que formo parte será capaz de acadalo.

Serás a alcaldesa máis nova de Galicia, o ve como un reto?

A alcaldía sempre é un reto, independentemente da idade que teñas. Pero si, é un reto maior porque a xente nova sempre temos que andar demostrando que somos capaces de facer as cousas, pero realmente eu supoño que será bastante semellante a ser alcalde con máis idade.

Que lle diría a xente moza que ten inquedanzas políticas e pensa en adicarse a elo?

Animo a xente a que lle gusta de verdade a política a que se meta, que se implique e que traballe duro polas súas raíces e pola súa terra. No rural tamén hai futuro.