Allariz adhírese á Rede “Cidades que Camiñan”

A Rede “Cidades que Camiñan” é unha asociación internacional sen ánimo de lucro, aberta ás entidades locais e outras administracións públicas que procura despregar políticas de mobilidade urbana pondo como elemento protagonista os viandantes. O Concello de Allariz vén de sumarse a esta rede, na procura de converter ó territorio do concello nun espazo que favoreza a accesibilidade e a seguridade dos vieiros municipais, para facilitar a “camiñabilidade” en Allariz.

O “metrominuto” é un dos proxectos centrais que o Concello levará a cabo grazas á participación nesta rede. Trátase dun mapa deseñado con elementos visuais dos planos de metro, pero adaptado á realidade do concello alaricano, incluíndo lugares de referencia do casco urbano e a distancia e o tempo aproximado que se tarda en chegar camiñando.

Esta adhesión á Rede de “Cidades que Camiñan” supón outros beneficios ó Concello, derivados dos servizos que ofrece a propia entidade, coma o asesoramento técnico e as actividades formativas e de difusión de boas prácticas en mobilidade urbana.