Allariz será capital do curtido durante tres días

O Concello de Allariz converterase dende o 26 ata o 28 de setembro no “corazón do mundo do coiro” durante a celebración das Xornadas dos Oficios do Coiro 2025, unha cita que aposta polas tradicións e coñecementos artesanais ligados á curtición.

Este traballo definiu durante séculos a identidade alaricana ata o século XX, configurando a paisaxe urbana do río Arnoia ó seu paso pola vila.

Durante estas tres xornadas, espazos como A Fábrica, A Paneira e o Museo do Coiro serán o escenario dun programa de actividades que inclúe obradoiros prácticos ligados ó coiro, como a restauración do coiro, que será o sábado 28 na Fábrica ás 10,30 horas ou a creación artística con po de coiro, da man de Lúa Fernández, o mesmo día no mesmo sitio.

Tamén haberá charlas especializadas con expertos como os profesionais chegados de Guimarães ou o Museu Municipal de Alcanena, que ofrecerá un relatorio na Paneira o sábado 27, ás 12,30 horas, da man de Gabriel de Oliveira.

Ademais, o programa ofrecerá exposicións artísticas, roteiros pola memoria dos curtidores alaricanos e un mercado de ferramentas e produtos para o sector, que se celebrará ó longo da fin de semana na Fábrica.

Punto de encontro

Estas xornadas son un punto de encontro entre profesionais, artesáns e público xeral para propiciar o intercambio de experiencias e a posta en valor do patrimonio inmaterial. Coas Xornadas dos Oficios do Coiro 2025, Allariz reafírmase na recuperación e dinamización do patrimonio artesanal, ofrecendo un espazo para coñecer, vivir e sentir a tradición curtideira.