Allariz súmase a 50 concellos para limpar ríos galegos

A Alameda alaricana será este domingo, 21 de setembro, o punto de encontro para veciños e voluntarios que participarán na XVIII Limpeza Simultánea de Ríos, unha actividade á que se suman un total de 51 concellos de toda Galicia para esta edición.

Esta xornada está impulsada por ADEGA, a través do seu Proxecto Ríos, e nela participarán preto de 70 asociacións, concellos, entidades, colectivos e centros de ensino, que baixo o lema “Móllate polos ríos” mobilizarán centos de persoas para desenvolver, de xeito simultáneo, unha acción colectiva e de concienciación social ó pé dos ríos.

Allariz súmase a estos cincuenta concellos, entre os que se atopan Ourense, Verín, A Coruña, Vigo ou Santiago de Compostela, entre outros moitos, e na web do proxecto está dispoñible a listaxe de concellos e asociacións participantes para poder sumarse ás actividades.

Educación e sensibilización

Ademais da limpar os cursos fluviais dos ríos que transcorren por estas localidades, a iniciativa pretende fomentar a conciencia ambiental e a participación cidadá, xa que o proxecto ten a finalidade de dar a coñecer o papel que xogan os ríos, amosando as súas problemáticas e promover iniciativas cidadás para o mantemento e mellora dos ríos, proporcionando ferramentas para a súa participación.