Allariz xa é oficialmente un novo destino termal

O Hotel Oca Vila de Allariz alcanzou oficialmente o status de balneario, case dous anos despois de que as súas augas fosen declaradas mineromedicinais en maio de 2023. A confirmación da aprobación chegou o venres dende a Xunta de Galicia tras ser aprobado polos distintos organismos que constatan que o hotel alaricano é o oitavo balneario da provincia de Ourense.

Maike Pazos, director do balneario, comentou que “a oportunidade que nos brinda este novo status non só nos afecta a nós, senón tamén a entidades locais e provinciais ao reforzar a imaxe de provincia termal que nos caracteriza” e fai fincapé en que é un valor engadido á toda a oferta turística que rodea tanto a vila de Allariz como a provincia.

Benestar e saúde

Maike tamén aclarou que o turismo que atrae as instalacións que dirixe é un público que lle da prioridade ao benestar que ao ocio. Malia que non falta a oferta do segundo, o turismo de saúde e coidados é o que se busca potenciar con esta nova denominación, e neste senso o director do balneario comenta que colaborarán coa Deputación en todo o posible “tanto na programación de estancias coma na creación de programas enfocados á saúde e o turismo de benestar”, aumentando o amplo abanico de opcións cos que xa contan.

O presidente da Deputación, Luis Menor, expresou a súa satisfacción por unha noticia que supón engadir “un elemento máis nun gran sector estratéxico do noso territorio como é o termalismo”. Unha boa noticia, dixo, que contribuirá incrementar a oferta terapéutica e de benestar na provincia e a dinamizar un concello “cun gran potencial turístico”.