Vicente Risco dá cita para celebrar o ano Castelao

A Fundación Vicente Risco (FVR) preparou dúas datas especiais no mes de outubro e outra en decembro para novas actividades dentro do programa de actividades para celebrar o “ano Castelao”.

A primeira data será o vindeiro venres, 3 de outubro, e consistirá na visualización de dous filmes: “O pai de Migueliño”, de Miguel Castelao e “Antes de Nós”, de Ángeles Huerta, acabada de estrear este ano. A Casa da Cultura alaricana acollerá a sesión de cine que atende á figura do senlleiro autor de Rianxo, e que comezara ás 20,30 horas. Ó remate, os asistentes poderán gozar dun diálogo cos directores, moderado por Xosé Barato.

O seguinte sábado, 11 de outubro, inaugurarase na sede da Fundación Vicente Risco, na vila alaricana, a exposición “Vicente Risco e Daniel Castelao: Galiza como proxecto vital”, que contará con obras orixinais dos autores que acolle a Fundación e que pasará a ser parte das coleccións permanentes da Fundación, segundo explica Elvira Carregado, presidenta da FVR.

A derradeira cita deste ciclo será xa no mes de decembro, o día 13 ás 10,30 horas, na sede da fundación, que convidará a unhas xornadas sobre a exposición, dando peche ó programa logo de dous meses da súa inauguración.

O programa conta coa colaboración da Xunta de Galicia, a Deputación de Ourense e o Concello de Allariz.

Ano Castelao

Neste ano 2025 cúmprese o 75 aniversario do falecemento de Daniel Castelao, un ano que estivo ateigado de celebracións na súa honra por toda Galicia, da man de asociacións e institucións, para conmemorar a un dos máis senlleiros autores da literatura galega.