Desvelado o XXIX Premio Vicente Risco de Ciencias Sociais

A sede da Fundación Vicente Risco en Allariz celebreou albergou a reunión do xurado do XXIX Premio Vicente Risco de Ciencias Sociais, que decidiu outorgar por unanimidade o premio a “Separados por uma língua comum. Lusofilia e galeguidade na correspondência entre intelectuais da Galiza e do Norte de Portugal no século XX”, de Xosé Ramón Freixeiro Mato.

O xurado valorou deste traballo a “perspectiva interdisciplinar na que se sustenta a análise da correspondencia entre intelectuais galegos e portugueses ao longo do século XX”. Valorou asimesmo a “abordaxe feita dende a glotopolítica á sociolingüistica, pasando pola análise das diferenzas interlingüística entre a lingua galega e portuguesa, a perspectiva poscolonial, ata as posibles solucións á cuestión lingüística en Galicia, o conflito simbólico e as disputas ideolóxicas”. Os membros do xurado tamén salientaron que se trata dun traballo rigoroso, ben estruturado e cun bo dominio das fontes, así como polo seu interese e actualidade.

Mencións especiais

O xurado fixo dúas mencións especiais a dous traballos etnográficos, un sobre etnomedicina, presentado baixo o lema de “Levantar a paletilla caída. Medicina integrada na tradición galega”, de Lidia Mariño Ventoso; e o de “Historias de muíños e muiñeiros/as no cerne de Galicia”, de María Montserrat Varela Vázquez.