A vila de Allariz abandera a pluralidade literaria

O Festival Literario de Allariz regresará a vila do Arnoia os días 4 e 5 de xullo. Un evento que alcanza a súa cuarta edición e que este ano estará adicado a resaltar a pluralidade das literaturas do Estado e o papel da tradución na expansión das letras.

Cristina Sánchez-Andrade, Suso de Toro, Miquel Martín i Serra, Isaac Xubín, María Alonso Seisdedos e Garazi Albizua serán os convidados a esta edición que se desenvolverá na sala de exposición de A Fábrica. “O Estado español ten literaturas diversas. Créase en galego, éuscaro, catalán e castelán. Para que cada literatura medre é imprescindible a tradución. Destes e doutros temas falarase neste FLAZ”, resumían os organizadores tras a presentación do cartel celebrado no salón de plenos, nun acto no que participou César Lorenzo, director de Aira Editorial, a alcaldesa Cristina Cid e María López, concelleira de Promoción Económica.

O FLAZ, nacido no ano 2022, é un proxecto de promoción e fomento da lectura que reúne durante dúas xornadas figuras da literatura en todas as linguas do Estado, da man da librería Aira das Letras e do Concello de Allariz, contando coa colaboración da Deputación provincial de Ourense, da librería Maruxairas, a editorial Aira, a empresa de servizos turísticos Xeitura, a pastelaría Fina Rei e os establecementos de hostalería Fío de Liño e Alarico.

“Literatura e loita de clases”, un diálogo entre Garazi Albizua e Miquel Martín i Serra, será o primeiro encontro deste cuarto FLAZ, na tarde do venres. O sábado, ás 12,30 horas, será o turno para “A tradución literaria como resistencia fronte ao automatismo”, diálogo entre María Alonso Seisdedos e Isaac Xubín. Xa pola tarde terá lugar o encontro entre Cristina Sánchez-Andrade e Suso de Toro baixo o título: “O estilo literario na idade de ouro da trama”. “Pontes e canles: Escrita, tradución e mercado literario” é o título da mesa redonda coa que rematará o FLAZ 2025 (19,30 horas), coa participación dos seis convidados.