A Corporación de Xinzo reuniuse este venres nunha sesión plenaria de carácter extraordinario e urxente co obxectivo de realizar o pago, antes de que remate o ano, de facturas pendentes de pequenos proveedores.
A comezos de setembro, Intervención emitiu un reparo suspensivo que obrigou a paralizar o procedemento para dito pago por falta de liquidez. Agora si será posible realizalo grazas á incorporación ao orzamento actual de 210.537 euros procedentes de aportacións do Estado. Desta cantidade, 45.154 euros destinaranse a abonar o custe das facturas afectadas.
Así, logo do voto favorable de todos os grupos, farase fronte ao pago, aínda que quedará pendente o gas xa que o goberno cuatripartito decidiu iniciar un proceso de negociación coa empresa suministradora tralo que consideran “un notable incremento” dos prezos da enerxía.
O resto da aportación destinarase outros gastos, a diferentes actividades culturais e a reforzar a programación de Nadal, tal e como informaron no Consistorio. A alcaldesa, Elvira Lama, destacou a importancia deste trámite: “Son facturas de pequenos provedores locais cos que este grupo de goberno intenta cumprir o antes posible”, manifestou.
Coa abstención da concelleira non adscrita, Montserrat Lama, e o voto en contra do Partido Popular, saíu adiante a ratificación da segunda modificación do convenio entre a Confederación Hidrográfica Miño-Sil e o Concello de Xinzo de Limia para o financiamento e execución do proxecto de demolición da presa de Gudín no río Faramontaos. A demolición, de obrigado cumprimento, está a sufrir retrasos na tramitación, polo que se amplía un ano máis o prazo para realizala.
