Álvaro Conde Gil, un cativo de sete anos e alumno do Colexio Rosalía de Castro de Xinzo de Limia, resultou gañador -entre cativos de toda Galicia- da XIII edición do certame “Deseña unha xoia para a túa nai” que organiza o Colexio Oficial de Xoiaría de Galicia.
Este certame retaba a nenos de 0 a 12 anos a deseñar a xoia que lles gustaría regalar a súa nai. Diferenciados en categorías por idades, os participantes debuxaron a xoia que lle regalarían a súa nai e, entre os miles de traballos presentados, o xurado seleccionou a 80 finalistas.
No acto de entrega de premios, que se celebrou en Ponteareas, desvelouse o gañador da categoría de 5 a 7 anos: o limiá Álvaro Conde, acompañado dos demais gañadores. Tomando como referencia os debuxos enviados, os xoieiros profesionais que actuaron de xurado encargaron a creación das xoias gañadoras.
Así, estas doce xoias únicas dos premiados na XIII edición súmanse ás 126 xoias fabricadas con anterioridade nas pasadas edicións. Un premio que durará “para sempre” e que conta coa garantía de profesionalidade dos xoieiros colexiados de Galicia. “Queremos con esta iniciativa facer máis visible esta profesión ante a sociedade, acercando aos máis pequenos a este mundo”, conclúen dende o Colexio de Xoiaría.
