O limiao “Miro” Martínez, premio Pedra Alta 2024

A Xunta Directiva do Padroado do Museo da Limia, en Vilar de Santos, a proposta do seu Consello Asesor, acordou este pasado sábado conceder o VII Premio Pedra Alta ao historiador limiao Edelmiro “Miro” Martínez Cerredelo.

Miro Martínez (Xinzo de Limia, 1946), designado Fillo Predilecto do seu concello natal no ano 2022, foi a figura escollida na xuntanza do Padroado, á que acudiron máis de 20 membros, en base ao “intenso e fecundo traballo de investigación e difusión centrado na memoria máis próxima das terras da Limia, un campo case ermo antes del”.

A entrega do galardón, unha réplica en granito da Pedra Alta, obra do escultor limiao Xosé Lois Carreira, acompañada dun diploma acreditativo, farase nun acto público solemne que se celebrará no propio Museo da Limia o vindeiro 9 de novembro. O acompañamento musical do acto correrá a cargo do pianista Luis Humberto Cao e do tenor Baldomero Pavón. A xornada festiva concluirá cun xantar aberto a tódolos asistentes, con menú composto por cocido limiao.

Distinción á Terra do Limia

A Asociación Padroado do Museo da Limia instaurou o Premio Pedra Alta para distinguir a persoas ou entidades cuxa obra ou labor é capaz de proxectar unha pegada merecente de consideración, ben dentro nas Terras do Limia, ou fóra delas, sempre que naceran neste territorio.