Michi Gallego, limiao co compás cara a labor social

Michi Gallego, veciño de Xinzo, ten unha gran afección por viaxar e descubrir novos lugares e culturas. Este ano, como calquera outro verán, Michi está a realizar unha viaxe de 20 días pola India cun labor social, que consiste na reunión de material escolar doado por amigos, familiares ou negocios que quixeron facer a súa achega voluntaria.

PERFIL

Nome: Michi Gallego.

Formación académica: Enxeñeiro agrónomo pola Universidade Vigo.

Cargo: Técnico de operacións dunha empresa de servizos de auga.

LAS FRASES

“As condicións laborais aquí son moi pobres”

“Teñen gran variedade de alimentos, pero en Xinzo son mais sostibles e abundantes”

“Veño dunha poboación que eles consideran moi pequena, de 2.000 habitantes”

Cal é o maior contraste que atopa na India?

Onde máis marca a diferenza é o nivel económico que poida ter o país. Tamén a nivel laboral, hai traballos na India mal pagados, pouco cotizados e remunerados. As condicións laborais son moi pobres, inhumanas, de traballar 365 días ao ano sen vacacións. Os soldos son de 300-400 ao mes.

Notará moita diferenza na comida…

A India ten gran riqueza en variedade de alimentos, pero na nosa zona de Xinzo son mais sostibles e máis abundantes. Na India hai arroz á mostaza como alimento máis típico e na Limia temos máis trigo, pataca, millo….

Como é o día a día nun país tan masificado e poboado como o hindú?

A India é un territorio que está masificado. Nos últimos rexistros que houbo, rondaba os 1.500 millóns de habitantes. En Xinzo, a densidade por metro cadrado é moi inferior, iso permíteche unha relaxación do día a día, unha tranquilidade que este país non cho permite. Veño dunha poboación que eles consideran que é pequena, dos máis pequenos da India, e ten 2.000 habitantes. Eu dicíalles a xente de aquí que na miña aldea de Perrelos somos 30 e non o entendían, dicían que como podiamos ser 30 habitantes. Eu dicíalles que estaba bastante máis tranquilo na miña aldea con 30 habitantes que aquí con 2.000 habitantes.

Hai moita diferenza nos servizos e na calidade de vida?

Sí, son moi diferentes. En España estamos a anos luz nese aspecto. Aquí estás en calquera hotel ou calquera vivenda e tes cortes continuos de luz. A India ten outra xestión, onde non priorizan este tipo de condicións que temos nós na comarca da Limia. Que son servizos básicos, cunhas pautas a seguir para que todo o mundo dispoña da súa auga potable.